ኮሚሽኑ የፖለቲካ ፓርቲዎች የጋራ ምክር ቤትን አጀንዳዎች ተረከበ

ኮሚሽኑ የፖለቲካ ፓርቲዎች የጋራ ምክር ቤትን አጀንዳዎች ተረከበ

ህዳር 25/2017 ዓ.ም

የኢትዮጵያ ሀገራዊ ምክክር ኮሚሽን የፖለቲካ ፓርቲዎች የጋራ ምክር ቤት በ7 ክፍሎችና በ64 ዝርዝር ጉዳዮች ላይ ያዘጋጃቸውን አጀንዳዎች በዛሬው ዕለት ተረክቧል።

አጀንዳዎቹን የኮሚሽኑ ዋና ኮሚሽነር መስፍን አርዓያ (ፕሮፌሰር) ከሌሎች ኮሚሽነሮች ጋር በጋራ ምክር ቤቱ ሰብሳቢ  አቶ ሰለሞን አየለ ከተመራው የምክር ቤቱ የስራ አስፈፃሚ አባላት ልዑክ ተረክበዋል።

የኢትዮጵያ ሀገራዊ ምክክር ኮሚሽን ዋና ኮሚሽነር መሥፍን አርአያ  (ፕሮፌሰር) ኮሚሽኑ ከምክር ቤቱ ጋር የመግባቢያ ስምምነት ተፈራርሞ በጋራ እየሠራ መቆቱን ተናግረዋል።

ኮሚሽኑ በተቋማትና በማህበረሰብ ክፍሎች ተደራጅተው የሚቀርቡ አጀንዳዎችን በአግባቡ እንደሚጠቀምባቸውም አክለዋል፡፡

ሌሎች ተቋማትና ማህበራትም የተደራጁ አጀንዳዎቻቸውን እንዲያስረክቡ ነው ዋና ኮሚሽነሩ መልዕክት ያስተላለፉት፡፡

የፖለቲካ ፓርቲዎች የጋራ ምክር ቤቱ ሰብሳቢ  አቶ ሰለሞን አየለ በበኩላቸው ፖለቲካ ፓርቲዎች አካታች ሀገራዊ ምክክር እንዲደረግ ሚናቸውን መወጣት ይገባቸዋል ብለዋል።

የተደራጁት የፖለቲካ ፓርቲዎች አጀንዳዎች ለአካታችና አሳታፊ ሀገራዊ ውይይት የሚያግዙ እንደሚሆኑም አስረድተዋል።

ምክር ቤቱ ዛሬ ለኮሚሽኑ ያስረክባቸው አጀንዳዎች በምክርቤቱ በሙሉ ድምፅ የፀደቁ መሆናቸውንም ተናግረዋል፡፡

የአጀንዳ ማሰባሰብ ሥራውን አጠናክሮ የቀጠለው የኢትዮጵያ ሀገራዊ ምክክር ኮሚሽን  ከሁሉም ባለድርሻ አካላት በተለያዩ አማራጮች አጀንዳዎችን በስፋት መረከቡን እንደሚቀጥልም በመድረኩ ተገልጿል።