የኢትዮጵያ ሀገራዊ ምክክር ኮሚሽን በሐዋሳ ከተማ አስተዳደር ስር ከሚገኙ 8 ክፍለ ከተሞች ከተውጣጡና እያንዳንዳቸውም 9 የማህበረሰብ ክፍሎችን ወክለው ከመጡ 3,600 ተሳታፊዎች ጋር ሐሙስ ሰኔ 1 ቀን 2015 ዓ.ም ስብሰባን አድርጓል፡፡ በሐዋሳ ዩኒቨርሲቲ አፍሪካ አዳራሽ እና በሐዋሳ ሚሊኒየም አዳራሽ የተደረገው ይህ ስብሰባ ለሚቀጥለው የምክክር ሂደት አስፈላጊ የሆኑ ተግባራት አከናውኗል፡፡

በስብሰባው ላይ ሁለት ክንውኖች የተካሄዱ ሲሆን በጠዋቱ መርሀ ግብር ላይ ስለ ኮሚሽኑ ስራዎችና ስለ አጀንዳ ማሰባሰብ ሂደት በኮሚሽኑ አካላት ለተሰብሳቢዎቹ ገለፃ ተደርጓል፡፡ በመቀጠልም ከየወረዳው ተወክለው የመጡ ተሳታፊዎች ለአጀንዳ ማሰባሰብ ሂደት የሚወክሏቸውን ሁለት ሁለት ግለሰቦች የመረጡ ሲሆን ይህም በከሰዓቱ መርሃ ግብር ተከናውኗል፡፡ በተጨማሪም ተሰብሳቢዎቹ በምክክር ሂደቱ ውስጥ ቢነሱ ያሉዋቸውን አጀንዳዎች በቡድን ውይይቶቻቸው ውስጥ አመላክተዋል፡፡

ኮሚሽኑ የሚያከናውነው የተሳታፊዎች ልየታ በሐዋሳ ዙሪያ ወረዳዎች እና በሲዳማ ክልል የዞን ከተሞች በቀጣዮቹ ጊዜያት እየተከናወነ ይቀጥላል፡፡